دانیشتنی حەوتوانە 33
❂ناوەندی فەرهەنگی – هونەریی جامی❂
سی و سێیەمین دانیشتنی زانستیی ناوەندی فەرهەنگی هونەری جامی بەڕێوە چوو
تەوەر: خوێندنەوەی دەقی خشتەنووسەکانی حیماسەی گیلگەمێش
وتاربێژ: جەواد سەید محەممەدی(زمانناس)
بەڕێوەبەر: حەسەن محەممەدی
✓ سی و سێیەمین دانیشتنی حەوتووانەی ناوەندی فەرهەنگی هونەریی جامی بە بەشداری هۆگرانی فەرهەنگی کوردی، ڕۆژی پێنج‌شەممە ۲۲ی سەرماوەز ١٤٠٣ی هەتاوی لە نووسینگەی ناوەندی فەرهەنگی – هونەریی جامی بەڕێوە چوو.
☜ ناوەندی جامی له درێژەی پڕۆژەی فکری و فەرهەنگی خۆی ئەوجار کۆڕەکەی خۆی تەرخان کرد، بۆ ئاوڕ دانەوە و باس کردن لەسەر دەقی وەرگێڕدراوی گیلگەمێش.
ڕێزدار جەواد سەید محەممەدی وەرگێڕی دەقی گیلگەمێش لەو کۆڕەدا سەرەتا هۆکار و چۆنێتی وەرگێڕانی ئەو دەقە گرینگەی بۆ ئامادەبووان هێنا گۆڕێ. بەڕێزیان، پێی وابوو، دەقێکی وەک گیلگەمێش پێویستە له ڕووی زمانییەوە سرنج و بایەخێکی گرینگی پێبدرێ. واتا هەر زمانێک شیاوی دەقێکی وەک گیلگەمێش نییە. لە درێژەدا وەرگێڕ بۆ ئامادەبووانی باس کرد، کە بۆ وەرگێڕانی گیلگەمێش لە هەموو دەقە کوردییەکانی بەردەست بە زمانی کوردی بە گوێرەی پێویست کەڵکی وه‌رگرتووە. تەنانەت لەگەڵ دەقی ئینگلیزی گیلگەمێش بەراوردی کردوون.
پاشان سەید محەممەدی، پێشەکییەکی کە لە لایەن دوکتور “قوتبەدین سادقی”یەوە، بۆ نوسخە کوردییەکەی گلیگەگەمێش نووسراوە بۆ ئامادەبووانی خوێندەوە.
له بەشێکی دیکەی کۆڕه‌کەدا، وەرگێڕ، چەند بەشی له وەرگێڕانەکەی خۆی بۆ ئامادەبووان خوێندەوە.
بەشی کۆتایی کۆڕەکە تەرخان کرا بۆ وەرگرتنی بیر و بۆچوونی بەشداربووان لە سەر چەندوچۆنی وەرگێڕانی گیلگەمێش لە لایەن بەڕێز سەید محەممەدییەوە. له‌و بەشەدا کە ماکە و جەوهەری سەرەکی کۆڕەکە بوو، هەر کام لە ئامادەبووان لە سۆنگەی ڕا و بۆچوونی خۆیەوە پاش بیستنی ده‌قی وەرگێڕانەکە، سرنج و ڕەخنە و پێشنیاری خۆیان پێش‌کێش کرد.
جێگای ئاماژەیە کە بەڕێز جەواد سەید محەممەدی وەک وەرگێڕی ده‌قی گیلگەمێش پێی باش بوو بەر لە چاپ دەقی وەرگێڕدراوەی گیلگەمێش، بخرێتە بەر تیشکی ڕەخنە و سرنجی ئامادەبووانی ناوەندی فکری، فەرهەنگی و هونەریی جامی.
لە بەش دووەمی کۆڕی ئەمجارە، لە لایەن ناوەندی فەرهەنگی هونەریی جامییەوە ڕێز گیرا لە کاک شەهرام ئیراندووست بۆ بەڕێوە بردنی فێستیواڵی چیرۆک‌بێژیی منداڵانی هالان لە مەهاباد.
✓ بەشێکی تری بەرنامەکە بریتی بوو لە ” پرسیار و وڵام”. لەم بەشەدا ئامادەبووان پرسیارەکانی خۆیان لە بابەت تەوەری باسەکە خستە ڕوو و وڵامی پێویست لە لایان وتاربێژەوە ئاراستەی ئەو بەڕێزانە کرا.
١٤٠٣/٠۹/۲۲
☟
https://t.me/nawendy1