دانیشتنی حەوتوانە 101
◉ناوەندی فەرهەنگی – هونەریی جامی◉
سەد و یەکەمین دانیشتنی ناوەندی فەرهەنگی هونەریی جامی بەڕێوە چوو.
تەوەر: گێڕانەوەی دوێنێ بە کاتی ئەوڕۆ
وتاربێژ: عەزیز وەلیانی
بەڕێوەبەر: یاقووب خزری
سەد و یەکەمین دانیشتنی ناوەندی فەرهەنگی هونەریی جامی بە بەشداری ئەندامانی جامی، تاقمێک لە نووسەران و هۆگرانی بەشی فەرهەنگی و کۆمەڵایەتی، لە شاری مەهاباد، ڕۆژی دووشەممە ٩ی خەرمانانی ١٤٠٥ی هەتاوی لە نووسینگەی ناوەند بەڕێوە چوو.
☜ ناوەندی فەرهەنگی هونەریی جامی لە درێژەی بەرنامەکانی خۆیدا، ئەو دانیشتنەی تەرخان کردبوو بە بابەتێکی تایبەت و پێوەندیدار بە مێژووی شاری مەهاباد.
کاک عەزیز وەلیانی وتاربێژی ئەم جارەی ناوەندی جامی، سەرەتا وەک پێشەکی و بەر لە دەسپێکی وتارە سەرەکییەکەی، باسێکی لە سەر بەرهەمە فارسییەکەی خۆی بە نێوی ” پرتوی از دیار کهن ” ئاراستە کرد و کوتی: ” ئەم کتێبە ئاوڕی پێویستی لێ نەدراوەتەوە “. لە درێژەدا بابەتەکەی بە نێوی ” گێڕانەوەی دوێنێ بە کاتی ئەوڕۆ ” دەست پێکرد. ناوەڕۆکی ئەم باسە پەیوەست بوو بە کتێبێک بە نێوی ” سابڵاغ و ساڵی ساڵان ” نووسینی وتاربێژ( عەزیز وەلیانی ). ئەم کتێبە ئامادەی چاپە و لە داهاتوویەکی نیزیکدا دەکەوێتە بەر دیدی خوێنەران.
وتاربێژ ئاماژەی بەوەی دا لە نووسینی ئەم بەرهەمەدا لە شێوازی کڕۆنیکێل کەلکی وەرگرتووە. بەڕێزیان پێی وا بوو بەشێک لە مێژووی شاری مەهاباد لە گێڕانەوە و ناوەڕۆکی کتێبەکەدا بەرچاوە و لە ڕاستیدا دەکرێ وەک مێژووی زارەکی ئەم ناوچەیە لە قەڵەم بدرێ.
کاک عەزیز وەلیانی لە بەشێکی تری وتارەکەیدا وێنایەکی لە دووکانەکەی باوکی( لە کتێبەکەدا هاتووە ) بۆ بەشداربووان خستە ڕوو. پاشان هێندێک لە بیرەوەرییە خۆش و ناخۆشەکانی ئەو کاتی خۆی گێڕایەوە و هەستی ئامادەبووانی ورووژاند.
مامۆستا وەلیانی بە خوێندنەوەی پەخشانێکی ئەدەبی کۆتایی بە باسەکە هێنا.
لە بەشی کۆتاییشدا، ئامادەبووانی کۆڕەکە پرسیار و تێبینییەکانی خۆیان ئاراستەی وتاربێژ کرد و بەڕێزیان بە وردی لە چوارچێوەی باسەکە وڵامی پرسیارەکانی دایەوە.
ئاگاداری
دەنگەفایلی وتارەکەی مامۆستا عەزیزی وەلیانی بە دوو هۆکار بڵاو ناکرێتەوە:
یەکەم: بە پێی داواکاریی کاک عەزیز وەلیانی وتاربێژی ئەم جارەی ناوەندی جامی.
دووەم: ئەم بابەتە بڕیارە لە چوارچێوەی کتێبێک بە نێوی ” سابڵاغ و ساڵی ساڵان “ لە داهاتوویەکی نیزیکدا چاپ و بڵاو بکرێتەوە؛ بە وتەی نووسەری کتێبەکە بۆ پاراستنی ناوەڕۆکی بابەتەکان دوای لە چاپ دانی ئەم بەرهەمە ئەگەر گونجا بڵاو دەکرێتەوە.
بەڕێوەبەرایەتی ناوەندی فەرهەنگی هونەریی جامی